Disa nga fotografitë që Dua Lipa kishte publikuar gjatë pushimeve të saj në Kep Merli, në jug të Shqipërisë, nuk gjenden më në profilin e saj zyrtar në Instagram.
Këngëtarja britaniko-shqiptare kishte ndarë më herët me miliona ndjekës pamje nga natyra dhe ambientet ku po kalonte pushimet, duke shfaqur bukuritë e bregdetit shqiptar. Por këto imazhe tashmë janë hequr nga llogaria e saj.
Sipas raportimeve të Vox News, ky veprim vjen në një periudhë kur Dua Lipa ka qenë në qendër të vëmendjes për deklaratat e saj mbi mbrojtjen e zonave natyrore dhe debatet rreth ndërtimeve në bregdet.
Në një intervistë për podcastin e Lea Ypit, artistja foli për rëndësinë e ruajtjes së natyrës dhe mbështeti protestat kundër ndërtimeve në zona të mbrojtura, duke marrë reagime të shumta.
Fshirja e fotove nga Kep Merli ka nxitur diskutime, veçanërisht për shkak të lidhjes që familja e saj ka me këtë zonë përmes vilës së tyre. Megjithatë, nuk ka asnjë konfirmim nëse ky veprim lidhet me ndonjë arsye të veçantë apo është thjesht pjesë e një riorganizimi të profilit të saj në rrjetet sociale.
Kep Merli ka qenë prej vitesh një nga zonat më të diskutuara të bregdetit shqiptar, ndërsa fotografitë e Dua Lipës nga kjo zonë ishin kthyer në një promovim të bukur të peizazheve shqiptare për ndjekësit e saj në mbarë botën.
