Një investigim i publikuar nga revista amerikane The New Yorker ka rikthyer në vëmendje vëllezërit Andrew dhe Tristan Tate, duke sjellë pretendime të rënda për trafikim qeniesh njerëzore, shfrytëzim seksual, dhunë fizike dhe manipulim psikologjik ndaj grave.
Sipas reportazhit të gazetares britanike Heidi Blake, dy vëllezërit dyshohet se kanë ndërtuar për vite me radhë një sistem të organizuar për rekrutimin e grave të reja, të cilat tërhiqeshin me premtime për marrëdhënie romantike, martesë apo një të ardhme të përbashkët.
Hetimi mbështetet në dëshmitë e dhjetëra grave dhe në dokumente të autoriteteve hetimore. Sipas raportit, viktimat më pas izoloheshin dhe shtyheshin të punonin në industrinë e përmbajtjeve pornografike online, ndërsa të ardhurat kontrolloheshin kryesisht nga Andrew dhe Tristan Tate.
Në artikull thuhet se ata përdornin metodën e njohur si “Loverboy”, një praktikë e lidhur me rastet e trafikimit seksual, ku viktimat manipulohen emocionalisht dhe më pas vihen nën kontroll ekonomik dhe psikologjik.
Pas transferimit të tyre në Rumani, vëllezërit ngritën një kompleks pranë Bukureshtit, të njohur si “American Village”. Sipas investigimit, gratë e rekrutuara mbaheshin aty dhe përballeshin me kufizime në lirinë e lëvizjes dhe komunikimit.
Raporti përfshin gjithashtu akuza për dhunë fizike dhe seksuale ndaj disa grave. Disa prej dëshmitareve pretendojnë se janë përballur me kërcënime dhe presione për të mos raportuar atë që kishin përjetuar.
Një prej rasteve që çoi në nisjen e hetimeve në Rumani në vitin 2022 lidhet me një muzikante të re amerikane, e cila pretendon se ishte joshur me premtimin e një karriere në muzikë, por më pas ishte përballur me presione për të marrë pjesë në aktivitete pornografike online.
Në mesin e personave që kanë ngritur akuza ndaj Andrew Tate është përmendur edhe aktivistja kanadeze Lauren Southern, e cila ka deklaruar se është dhunuar seksualisht prej tij gjatë një vizite në Rumani.
Aktualisht, Andrew dhe Tristan Tate janë nën hetim në Rumani për trafikim qeniesh njerëzore, trafikim të të miturve dhe vepra të tjera që lidhen me shfrytëzimin seksual. Ndërkohë, Andrew Tate përballet edhe me akuza të veçanta në Britaninë e Madhe, përfshirë përdhunim dhe trafikim njerëzor.
Vëllezërit Tate i kanë mohuar vazhdimisht të gjitha pretendimet, duke i cilësuar ato si të motivuara politikisht. Megjithatë, procedurat gjyqësore ndaj tyre vazhdojnë, ndërsa investigimi i fundit ka rihapur debatin ndërkombëtar mbi aktivitetet dhe ndikimin e tyre në rrjetet sociale.
