Tory Lanez, 32 vjeç, është dërguar me urgjencë në spital pasi u godit disa herë me thikë në fytyrë ndërsa ndodhej në burg. Reperi, i cili po vuan një dënim prej 10 vitesh për të shtënat ndaj Megan Thee Stallion, ndodhej në oborrin e Institucionit Korrektues të Kalifornisë (CCI) në Tehachapi, Kaliforni, të hënën në mëngjes kur një tjetër i burgosur e sulmoi me thikë.
Nuk është bërë e ditur arsyeja e sulmit, por thuhet se plagët ishin aq të rënda sa kërkuan menjëherë ndihmë mjekësore. Lanez u transportua me ambulancë në një spital civil në Bakersfield, sipas raportimeve.
Në dhjetor 2022, ai u shpall fajtor për plagosjen e Megan Thee Stallion në këmbë në korrik 2020, pas një feste në shtëpinë e Kylie Jenner. Ai u akuzua për tre vepra penale: sulm me armë zjarri gjysmëautomatike, mbajtje e një armë të ngarkuar dhe të paregjistruar në automjet dhe përdorim i armës me neglizhencë të rëndë.
Pavarësisht dënimit, avokatët e Lanez kanë këmbëngulur për pafajësinë e tij dhe kanë deklaruar se do të ndjekin një apelim të vendimit. Ai do të ketë të drejtë për lirim me kusht në vitin 2029.
