Këngëtari i njohur i muzikës popullore, Sinan Vllasaliu, po kalon një periudhë të vështirë shëndetësore pas një aksidenti që e detyroi t’i nënshtrohej një ndërhyrjeje kirurgjikale.
Lajmin e ka bërë të ditur vajza e tij, Edona, përmes një postimi në rrjetet sociale, ku ka ndarë edhe një fotografi të artistit nga spitali. Në pamje, Sinani shihet duke u rikuperuar pas operacionit, nën kujdesin e stafit mjekësor.
Sipas Edonës, aksidenti ndikoi edhe në planet profesionale të këngëtarit. Ai ishte ftuar të performonte në dasmën e Dua Lipës, por për shkak të gjendjes së tij shëndetësore nuk arriti të merrte pjesë në këtë ngjarje të rëndësishme.
“Jemi mirënjohës që ai është në duar të sigurta dhe po rikuperohet”, shkroi ajo, duke dhënë një mesazh optimist për fansat dhe miqtë e artistit.
Postimi ka ngjallur reagime të shumta në rrjet, ku shumë ndjekës dhe kolegë i kanë uruar Sinan Vllasaliut shërim sa më të shpejtë dhe rikthim të shëndetshëm në skenë.
