Uljanova Çali, mjeshtre e krijimit të parukeve, i shoqi Gëzimi rrëfyen për herë të pare tek “Rudina” historinë e dhimbshme kur erdhi në jetë djali I tyre. Ata punonin në Mykonos të Greqisë dhe kur erdhi koha që djali të lindte, u detyruan të niseshin drejt Athinës sepse ishulli nuk kishte maternitet. Ajo lindi me operacion, por kujton sesi në vend të djalit I kishin sjellë një vajzë. “Ishte gëzim i madh, por mua më ndryshuan fëmijën fatkeqësisht. Ishte qëllimisht, sepse unë nuk kisha letra. Më plasën ujërat, shkoj urgjent dhe mbaj mend që doktori më thotë zgjohu se ke bërë një djalë të bukur, një bjond të bukur. Kaq mbaj mend sepse të jesh në narkozë është pak e vështirë, kur je si përgjumësh, nuk e ke situatën në dorë. Më çojnë në dhomë dhe pres fëmijën nga momenti në moment siç e marrin të gjithë nënat për ta ushqyer. Kishin kaluar dy ditë dhe fëmijën nuk ma sillnin. Thërras infermieren dhe i them po pres fëmijën, më thotë prit derisa të ta sjellin. i thashë ka dy ditë që nuk po më vjen djali, më thotë ti ke bërë vajzë dhe jo djalë. i thashë unë vërtet kam bërë operacion, por mbaj mend që unë kam bërë djalë dhe jo vajzë. Më sjellin vajzën me një kordele rozë, e shikoj që në kordele i kishin vendosur mbiemrin dhe më pas emrin. Emri dhe mbiemri ishte i saktë. Faktikisht fëmija ishte nga Etiopia, ishe me ngjyrë, nënë si për herë të parë thoja pse kaq i zi, pse ajo hunda e shtypur. Pastaj thashë dale çfarë po pres, unë kam bërë djalë. Kjo ndodhi sepse isha pa dokumente” – rrëfen Nova. Më tej, e sqaroi gëzimi cfarë ndodhi. “Etiopianes i kishin thënë që i kishte vdekur fëmija dhe mbase çifti që donte të blinte fëmijën sepse ndodhte në atë spital, kishin dëgjuar shumë raste që ishte bërë tregti. Fëmijën e etiopianes na e japin ne dhe fëmija jonë nuk del fare në skenë”, tha ai. Nova shtoi se ishte pronarja e saj që I ndihmoi në atë moment të vështirë. “Pronarja e bëri publike, tha unë do sjell televizionet, urgjentisht nxirrni fëmijën, sepse ditën që ka lindur Nova unë kam qenë prezente këtu me familjen time dhe ju nuk mund ta hidhni poshtë këtë dhe s’ka arsye që ju ta mbuloni këtë pjesë. Këtu përfiton dhe gruaja nga Etiopia, ajo kishte kërkuar trupin e fëmijës që ta merrte. Nuk harroj kur vjen dhe më puth duart dhe thotë ishte ti që kërkove fëmijën që përfitova dhe unë fëmijën tim. Ishte fati ynë që fëmija nuk kishte dalë akoma nga spitali sepse nëse do e hiqnin nga spitali ne nuk do e gjenim më kurrë”, tregoi ajo.
