Londra vazhdon të kryesojë renditjen e qyteteve më të mira në botë, duke mbajtur vendin e parë për të 11-in vit radhazi në raportin vjetor “World’s Best Cities” të publikuar nga Resonance.
Sipas vlerësimit, kryeqyteti britanik spikat për ndërthurjen e trashëgimisë historike me zhvillimin modern, ofertën e pasur kulturore, hapësirat e gjelbra, gastronominë e larmishme, muzetë e njohur ndërkombëtarisht dhe lidhjet e shkëlqyera me pjesën tjetër të botës.
Atraksione të famshme si Big Ben, Pallati Buckingham dhe zonat plot gjallëri e bëjnë Londrën një prej destinacioneve më të preferuara për vizitorët, ndërsa qyteti vijon të tërheqë miliona turistë çdo vit.
Raporti i Resonance rendit qytetet duke analizuar një sërë kriteresh, mes tyre cilësinë e jetesës, ofertën kulturore, infrastrukturën, potencialin ekonomik dhe përvojën që u ofrohet vizitorëve. Falë performancës së lartë në këta tregues, Londra ka arritur të mbetet në krye të klasifikimit global edhe këtë vit.
