Një pastor 55-vjeçar nga Florida ka ngritur një padi ndaj OpenAI dhe drejtuesit të saj, Sam Altman, duke pretenduar se këshillat e marra nga ChatGPT e shtynë të mos kërkonte ndihmë mjekësore, çka sipas tij përfundoi duke i rrezikuar jetën.
Scott Winters pretendon se chatbot-i minimizoi vazhdimisht simptomat që ai po përjetonte dhe e siguroi se gjendja e tij nuk kërkonte ndërhyrje urgjente. Sipas padisë, kjo bëri që ai të injoronte këshillat e familjarëve dhe miqve për t’u drejtuar në spital.
Pak kohë më vonë, 55-vjeçari pësoi një emboli pulmonare masive, e shkaktuar nga mpiksje gjaku në të dy mushkëritë. Dokumentet gjyqësore pretendojnë se mjekët i thanë se mungesa e lëvizjes kishte qenë një nga faktorët kryesorë që çoi në përkeqësimin e gjendjes së tij.
Në padi thuhet gjithashtu se ChatGPT i jepte përgjigje që përfshinin edhe referenca ndaj besimit të tij fetar, duke i përsëritur se do të shërohej dhe se nuk kishte arsye për t’u alarmuar. Sipas avokatëve të Winters, mënyra bindëse e komunikimit të chatbot-it krijoi një varësi psikologjike që ndikoi në vendimet e tij.
Nga ana tjetër, OpenAI ka reaguar përmes zëdhënësit Drew Pusateri, i cili theksoi se ChatGPT nuk është mjek dhe nuk duhet të përdoret si zëvendësim për diagnozën, trajtimin apo kujdesin profesional shëndetësor.
Ai sqaroi se inteligjenca artificiale mund të ndihmojë përdoruesit të kuptojnë më mirë informacionin ose të përgatiten për një konsultë me mjekun, por nuk duhet të merret si autoritet për vendime mjekësore.
Padia është depozituar në Gjykatën e Lartë të Qarkut të San Franciskos. Winters kërkon dëmshpërblim financiar dhe që OpenAI të vendosë masa shtesë sigurie për të shmangur raste të ngjashme në të ardhmen.
Në kushtet e përdorimit të ChatGPT theksohet se platforma nuk duhet të përdoret si burimi i vetëm për marrjen e vendimeve me pasoja të rëndësishme, përfshirë ato mjekësore, ligjore apo financiare.
