Ariana Grande ka bërë të ditur se tre nga koncertet e turneut të saj “Eternal Sunshine” nuk do të zhvillohen në datat e planifikuara fillimisht. Vendimi, sipas artistes, është marrë për shkak të disa vështirësive teknike dhe organizative që lidhen me përgatitjen e shfaqjes.
Përmes një mesazhi të publikuar në Instagram, këngëtarja njoftoi se koncerti i 12 korrikut në Barclays Center në New York është zhvendosur për më 14 korrik. Po ashtu, dy koncertet e parashikuara në TD Garden në Boston, më 22 dhe 24 korrik, do të mbahen përkatësisht më 23 dhe 26 korrik.
Grande kërkoi ndjesë ndaj fansave për ndryshimet, duke theksuar se vendimi është marrë për të garantuar që çdo detaj i shfaqjes të jetë në nivelin e duhur.
“Siguria e ekipit tonë dhe e publikut mbetet prioritet. Duam që ju ta përjetoni koncertin pikërisht ashtu siç e kemi konceptuar. Faleminderit për durimin dhe mirëkuptimin tuaj. Mezi pres t’ju shoh së shpejti,” u shpreh ajo.
Turneu “Eternal Sunshine” nisi më 6 qershor në Oakland të Kalifornisë dhe do të vijojë me ndalesa në disa qytete të Shteteve të Bashkuara, Kanadasë dhe Londrës. Organizatorët kanë konfirmuar se të gjitha biletat e blera do të jenë të vlefshme edhe për datat e reja të koncerteve.
