Ky sezon e gjeti moderatorin Eno Popi jashtë ekranit të Top Channel, pasi për arsye që nuk janë bërë të ditura, programi ‘Dilema’ nuk pati një rinovim kontrate për muajt e ardhshëm.
Por, edhe pse ndoshta për disa kohë Eno do t’i mungojë ekranit, dashamirësit e tij do të kenë mundësi ta ndjekin në një projekt të ri. Pikërisht aty ku nisi karriera e Popit më shumë se 20 vitë më parë, në Top Albania Radio, do të jetë takimi i radhës i moderatorit me publikun e tij.
Programi që do ta rikthejë Enon, do të jetë kushtuar udhëkryqeve të shoqërisë në shekullin që jetojmë. “Dilema Sociale” do të quhet ‘shtëpia; e re e gazetarit dhe pedagogut, moto e të cilit është “Filloje nga Zero”.
Lajmin e ka zbuluar vetë Eno përmes profilit të tij në “Instagram”. Mes intervistave dhe monologjeve, Popi do të përplasë ide dhe opinione, do të shpërfaqë të vërteta e thyejë mite e teori konspirative dhe mbi të gjithë shoqërojë dëgjuesin me atë që i mungon gjithmonë e më tepër sot, media cilësore dhe frymëzuese.
