Donald Trump ka dënuar sulmin e Rusisë ndaj Ukrainës. Gjatë një takimi në Florida ish-presidenti i SHBA-së tha se pushtimi i Ukrainës nuk do të kishte ndodhur kurrë nëse ai do të ishte ende në detyrë.
“Mund të nisë një luftë shumë e madhe në Europë. Kështu nisin. Joe Biden e shndërroi qetësinë në kaos, kompetencën në paaftësi, stabilitetin në anarki dhe sigurinë në katastrofë. Sulmi rus në Ukrainë është i tmerrshëm. Është një tmerr që nuk duhet të ishte lejuar kurrë të ndodhte. Dhe nuk do të kishte ndodhur kurrë. Lutemi për popullin krenar të Ukrainës. Të gjithë e kuptojnë që ky shkatërrim i tmerrshëm nuk do të kishte ndodhur nëse zgjedhjet tona nuk do të ishin manipuluar dhe unë do të isha ende president”, tha ai.
Trump e vlerësoi veten si i vetmi president amerikan i dekadave të fundit që ka mbajtur nën kontroll Vladimir Putin, duke mos e lejuar të pushtojë asnjë shtet.
“Nën drejtimin e Bush, Rusia pushtoi Gjeorgjinë. Nën drejtimin e Obamës mori Krimenë. Nën drejtimin e Biden pushtoi Ukrainën. Jam i vetmi president i shekullit XXI gjatë mandatit të të cilit Rusia nuk pushtoi asnjë shtet”, tha presidenti Trump.
