Industria e kinematografisë dhe e streaming-ut ka reaguar kundër luftës së Ukrainës, duke marrë dhe ajo masa shtrënguese kundrejt Rusisë. Premiera e filmit “The Batman” fiksuar për datën 3 mars është ndaluar nga shoqëria Warner Bros, e cila ka vendosur të “ngrijë” distribucionin e filmit. Të njëjtin veprim ka ndërmarrë dhe Disney, duke pezulluar prodhimet e saj kinematografike, përfshirë këtu dhe filmin e animuar të Pixar-it “Turning Red” i programuar për datën 10 mars.
Nuk ka mbetur prapa as gjigandi Sony Pictures duke stopuar shfaqet për një datë të papërcaktuar.
“Të gjitha mendimet dhe lutjet tona shkojnë për të gjithë ata që janë goditur dhe shpresojmë që gjithë kjo krizë të zgjidhet shpejt.” Ka thënë zëdhënësi i Sony Pictures. “Do të vazhdojmë të monitorojmë situatën hap pas hapi se si do të shkojë. Shpresojmë në një zgjdhje të shpejtë dhe paqësore të kësaj tragjedie.” thuhet në një deklaratë të shpërndarë nga WarnerMedia.
Një përgjigje kundër këtij konflikti ka dhënë dhe platforma Netflix e cila ka njoftuar se nuk do të shtojë kanalet ruse në platformën e saj.
