Influencuesi britaniko-amerikan Andrew Tate dhe vëllai i tij, Tristan Tate, janë ndaluar në Shtetet e Bashkuara pas një kërkese të autoriteteve britanike për ekstradimin e tyre, në lidhje me një seri akuzash të reja penale.
Sipas Shërbimit të Prokurorisë së Kurorës (CPS), Andrew Tate përballet me shtatë akuza të reja për përdhunim, si edhe me akuza për trafikim njerëzor dhe vepra të tjera që lidhen me shfrytëzimin e personave.
Edhe Tristan Tate akuzohet për krime të rënda. Dosja ndaj tij përfshin një akuzë për sulm seksual, dy akuza për përdhunim dhe tre akuza që lidhen me organizimin ose lehtësimin e trafikimit të qenieve njerëzore për shfrytëzim seksual.
Autoritetet britanike pretendojnë se ngjarjet për të cilat akuzohen dy vëllezërit kanë ndodhur mes korrikut 2010 dhe gushtit 2017. Me shtimin e akuzave të reja, numri i personave që konsiderohen viktima të mundshme në këtë çështje ka shkuar në shtatë.
Arrestimi i tyre në territorin amerikan u konfirmua nga Shërbimi i Marshalëve të SHBA-së, ndërsa Departamenti i Drejtësisë bëri të ditur se masa është ndërmarrë në kuadër të procedurës së ekstradimit të kërkuar nga Mbretëria e Bashkuar.
Në reagimin e tij, avokati mbrojtës Joseph McBride i hodhi poshtë akuzat, duke deklaruar se klientët e tij janë të pafajshëm. Ai i cilësoi procedurat si të motivuara politikisht dhe argumentoi se ato lidhen me një padi për shpifje që vëllezërit Tate kanë ngritur në SHBA. Sipas tij, gjykata do të vërtetojë se akuzat nuk qëndrojnë.
Çështja ndaj tyre nuk është e re. Në vitin 2025, prokuroria britanike njoftoi se Andrew Tate përballej me 21 akuza penale, ndërsa Tristan Tate me disa akuza të tjera serioze, për ngjarje që dyshohet se kanë ndodhur në periudhën 2012–2016. Një vit më parë, policia e Bedfordshire kishte siguruar urdhër-arreste evropiane për rikthimin e tyre nga Rumania, ku ata ishin gjithashtu nën hetim për çështje të veçanta.
Andrew dhe Tristan Tate i kanë mohuar vazhdimisht të gjitha akuzat e ngritura ndaj tyre. Tashmë mbetet në dorën e autoriteteve amerikane të vendosin nëse do të miratojnë ekstradimin e tyre drejt Mbretërisë së Bashkuar, ku pritet të zhvillohet procesi gjyqësor.
