Mali Olimp, maja më e lartë e Greqisë dhe një nga simbolet më të njohura të mitologjisë greke, është përfshirë zyrtarisht në Listën e Trashëgimisë Botërore të UNESCO-s.
Vendimi u miratua njëzëri gjatë sesionit të 48-të të Komitetit të Trashëgimisë Botërore, të mbajtur në Busan të Koresë së Jugut. Me këtë shpallje, Olimpi bëhet një nga vendet e rralla në botë që gëzon statusin e pronës së përzier, duke u vlerësuar njëkohësisht për rëndësinë e tij natyrore dhe kulturore.
I njohur në mitologjinë greke si vendbanimi i 12 perëndive olimpike, Mali Olimp ka një rëndësi të veçantë historike dhe kulturore. Në të njëjtën kohë, ai konsiderohet një nga zonat me biodiversitetin më të pasur në Evropë, ku gjenden rreth 2 mijë lloje bimësh, përfshirë dhjetëra specie endemike që nuk ekzistojnë askund tjetër në botë, si edhe një faunë e pasur me specie të rralla.
Me përfshirjen e Olimpit, numri i vendeve greke në Listën e Trashëgimisë Botërore të UNESCO-s arrin në 21, ndërsa tre prej tyre tashmë klasifikohen si prona të përziera, për vlerat e tyre natyrore dhe kulturore.
Autoritetet greke e kanë cilësuar këtë vendim si një moment historik, duke theksuar se njohja nga UNESCO do të ndihmojë në mbrojtjen e mëtejshme të malit dhe do të rrisë promovimin e tij si një prej destinacioneve më të rëndësishme natyrore dhe historike në botë.
