Detaje të reja kane dale ne drite nga vrasja e një vajze të huaj 24-vjeçare në Tiranë. Ngjarja e ndodhur në rrugën ‘Gjon Muzaka’ është zbuluar vetëm ditën e sotme, ndërsa policia thotë se, ka identifikuar dhe autorin e krimit.
Viktima dhe autori i dyshuar i krimit janë të dy palestinezë dhe e kishin marrë me qira banesën disa ditë më parë. Vajza e re ishte vrarë me thikë disa ditë para se të zbulohej krimi, ndërsa autori i dyshuar i krimit, 49-vjeçari9 me inicialet F. A., është arratisur nga Shqipëria, menjëherë pasi ka kryer vrasjen.
Njoftimi i Policisë së Tiranës:
Falë veprimeve të shpejta hetimore, identifikohet dhe shpallet në kërkim autori i vrasjes së 24-vjeçares, të gjetur pa shenja jete në një apartament në rrugën ‘Gjon Muzaka’.
Sektori për Krimet e Rënda në DVP Tiranë, falë veprimeve të shpejta hetimore dhe profesionale, si dhe analizimit të provave, ka identifikuar dhe shpallur në kërkim autorin e dyshuar të vrasjes së 24-vjeçares, shtetasin F. A., 49 vjeç.
Rreth orës 12:55, shërbimet e Policisë u njoftuan për gjetjen e një shtetaseje pa shenja jete në një apartament me qira, në rrugën ‘Gjon Muzaka’. Gjatë fazës së parë të hetimeve, u konstatua se viktima kishte plagë të shumta të shkaktuara me mjet prerës, që dyshohet të kenë qenë shkak për humbjen e jetës.
Në vijim të veprimeve, Policia bëri të mundur edhe identifikimin e viktimës, shtetases R. A., 24 vjeçe, e cila, së bashku me bashkëshortin e saj, shtetasin F. A., 49 vjeç, rezultojnë të jenë shtetas palestinezë dhe kishin marrë me qira apartamentin ku ndodhi ngjarja.
Nga të dhënat e deritanishme hetimore, dyshohet se autori i ngjarjes është larguar menjëherë jashtë territorit të Shqipërisë, pas kryerjes së krimit, i cili dyshohet të ketë ndodhur disa ditë më parë.
Grupi hetimor po vijon punën për përcaktimin e saktë të kohës së ngjarjes, nëpërmjet ekspertizës mjekoligjore dhe analizimit të provave të sekuestruara.
Vijon puna intensive për lokalizimin dhe kapjen e autorit të shpallur në kërkim, si dhe për dokumentimin e plotë të kësaj ngjarjeje.
Materialet do t’i referohen Prokurorisë për veprime të mëtejshme.
