Ndërsa kombëtarja spanjolle vazhdon rrugëtimin e saj në Kupën e Botës 2026, vëmendja nuk është përqendruar vetëm te ajo që ndodh në fushën e lojës. Krahas futbollistëve, gjithnjë e më shumë interes po marrin edhe partneret e tyre, të cilat duket se po krijojnë një “skuadër të dytë” jashtë fushe, mes bukurisë, karrierës, stilit dhe jetës private.
Nga influencuese e modele, te profesioniste në teknologji, psikologji apo art, partneret e lojtarëve të Spanjës kanë ndërtuar identitetin e tyre publik, shpesh larg hijes së futbollistëve me të cilët lidhen. Në rrjete sociale, ato ndiqen për stilin e jetesës, modën, udhëtimet, familjen dhe karrierat personale.
Një prej emrave që ka tërhequr vëmendje është Inés García, partnerja e Lamine Yamal. Vetëm 21 vjeçe dhe me origjinë nga Sevilla, ajo ka ndërtuar profilin e saj si krijuese përmbajtjeje në fushën e lifestyle-it dhe modës. E lidhur me një agjenci influencuesish pranë Dulceida-s, Inés po kthehet në një nga figurat e reja më të komentuara në rrethin e talentit të Barcelonës dhe kombëtares spanjolle.
Në krah të Nico Williams është Ainhi García, e cila dallon për një profil ndryshe nga ai klasik i vajzave të botës së futbollit. Me formim akademik dhe karrierë në fushën e inteligjencës artificiale, ajo kombinon teknologjinë me një prani aktive në rrjetet sociale, ku ndan momente nga moda, udhëtimet dhe jeta e përditshme.
Alejandra Dorta, partnerja e Pedrit, vjen nga Tenerife dhe punon si modele dhe influencuese. Me një stil modern, urban dhe minimalist, ajo ka krijuar një imazh elegant në rrjete sociale, por pa e ekspozuar shumë jetën e saj private.
Edhe Lola Liberal, bashkëshortja e Mikel Merinos, është pjesë e kësaj liste. Modele me profesion, ajo u martua me futbollistin në qershor 2024 dhe së fundmi është bërë nënë për herë të parë. Profili i saj është më i qetë dhe familjar, larg ekspozimit të tepruar mediatik.
Në krah të Gavit është Ana Pelayo, e diplomuar për Kriminologji në Universitetin e Seviljes. Ajo është gjithashtu krijuese përmbajtjeje, me fokus në modë, ushqim dhe lifestyle, duke sjellë një imazh elegant, por të thjeshtë dhe të afërt me ndjekësit.
Rosa Pereira, partnerja e Fabián Ruiz, është psikologe me formim profesional dhe një profil social të fokusuar te udhëtimet dhe jeta personale. Pas martesës me futbollistin, çifti ka ndarë me publikun edhe momente të rëndësishme, përfshirë lajmin e pritjes së fëmijës së tyre të parë.
Një tjetër emër që bie në sy është Laura Abla, partnerja gjermane e Dani Olmos. Ajo është krijuese përmbajtjeje në TikTok dhe Instagram, ku publikon video nga rutina e përditshme, moda, vlogs dhe momente argëtuese. Prania e saj është bërë edhe më e dukshme për shkak të marrëdhënies me futbollistin spanjoll.
Claudia Rodríguez, partnerja e Marc Cucurellas, kombinon punën si dizajnere mode dhe krijuese përmbajtjeje me jetën familjare. Çifti ka tre fëmijë dhe shpesh ndan momente që lidhen me prindërimin dhe jetën në familje.
Nga Londra, María Hurtado, partnerja e Pedro Porros, sjell një profil të përqendruar te familja, moda dhe përditshmëria. Përmbajtja e saj fokusohet veçanërisht te mëmësia dhe jeta personale larg zhurmës së fushës.
Listës i bashkohet edhe Sara Botello, partnerja e Aymeric Laporte. Valltare e specializuar në kërcim bashkëkohor, ajo ndan në rrjetet sociale momente nga stërvitjet, udhëtimet dhe jeta familjare me dy fëmijët e çiftit.
Në një Botëror ku Spanja po kërkon lavdinë në fushë, duket se jashtë saj po luhet edhe një tjetër garë: ajo e elegancës, stilit dhe vëmendjes publike. Partneret e futbollistëve spanjollë po dëshmojnë se nuk janë thjesht shoqëruese në tribunë, por gra me karrierë, imazh dhe ndikim të tyre.
Galeria fotografike
