Biznesmeni amerikan Michael Rubin organizoi edicionin e pestë të festës së tij tashmë të famshme White Party, në rezidencën e tij në Southampton, New York, duke bashkuar disa nga emrat më të mëdhenj të muzikës, kinemasë dhe sportit.
Rubin është themelues dhe CEO i kompanisë globale Fanatics, një nga platformat më të mëdha në botë për shitjen e fanellave dhe produkteve zyrtare sportive. Përmes këtij suksesi në biznes, ai është kthyer edhe në një figurë të njohur sociale, duke organizuar çdo verë një nga eventet më ekskluzive në Hamptons.
White Party është kthyer në një traditë verore elitare në SHBA dhe zhvillohet çdo vit në prag të 4 Korrikut. Eventi njihet për kodin e veshjes me të bardha dhe për rolin e tij si një takim joformal mes figurave të fuqishme të industrive të ndryshme, nga muzika dhe filmi deri te sporti dhe biznesi.
Në mesin e të ftuarve këtë vit ishin Jay-Z, Cardi B, Travis Scott, Tate McRae, Leonardo DiCaprio, Teyana Taylor, Shaboozey, Ciara, Alicia Keys, Swizz Beatz, Ice Spice, Lil Wayne, Snoop Dogg, DJ Khaled, Lil Baby, Meek Mill, The Chainsmokers, French Montana dhe Fat Joe.
Mbrëmja solli edhe performanca live nga Lil Wayne, Snoop Dogg dhe Cardi B, ndërsa festa u mbyll me fishekzjarrë spektakolarë mbi Oqeanin Atlantik, shoqëruar nga performanca e Alicia Keys me këngën “Empire State of Mind”.
Në event morën pjesë edhe figura të njohura të sportit si Tom Brady, Mike Tyson, Karl-Anthony Towns, Davante Adams, Klay Thompson, Alex Rodriguez dhe Puka Nacua.
Sipas Rubin, data e këtij viti u zgjodh duke marrë parasysh kalendarin e eventeve të tjera në New York, por jo për shkak të tyre. Ai theksoi se qëllimi ishte që të ftuarit të mos detyroheshin të zgjidhnin mes eventeve të ndryshme në të njëjtën periudhë.
“Ne diskutuam për datat dhe ishim të vetëdijshëm për atë event, por nuk e ndryshuam datën për shkak të tij. Thjesht nuk donim që njerëzit të detyroheshin të zgjidhnin,” u shpreh Rubin për People.
White Party vazhdon të mbetet një nga eventet më prestigjioze të verës në SHBA, duke tërhequr çdo vit dhjetëra personalitete të njohura nga e gjithë bota.
Ndërkohë, Jay-Z po përgatitet për rikthimin e tij në skenë me tre koncerte në Yankee Stadium nga 10 deri më 12 korrik, në kuadër të 30-vjetorit të albumit Reasonable Doubt dhe 25-vjetorit të The Blueprint.
Galeria fotografike
