Influencuesja dhe modelja e njohur, Nara Smith, ka bërë të ditur përmes një videoje emocionale në rrjetet sociale se vajza e saj 2-vjeçare, Whimsy Lou, është diagnostikuar me kancer.
24-vjeçarja, e njohur për videot e saj të gatimit dhe stilit të jetesës, tregoi se ajo dhe bashkëshorti i saj, modeli Lucky Blue Smith, 28 vjeç, e morën lajmin tronditës pas vizitave mjekësore që nisën kur vunë re një shenjë shqetësuese te vajza e tyre.
Sipas rrëfimit të saj, fillimisht ata u drejtuan në urgjencë, ku mjekët nuk ishin të sigurt për diagnozën. Më pas, një vizitë te pediatri dhe ekzaminimet në një spital për fëmijë çuan në analiza më të thelluara, përfshirë rreze X, ultratinguj dhe një biopsi. Pas këtyre ekzaminimeve, familja u informua se fëmija kishte kancer dhe se sëmundja ishte përhapur, duke kërkuar nisjen e menjëhershme të kimioterapisë.
View this post on Instagram
Smith tha se periudha ka qenë shumë e vështirë për familjen, veçanërisht duke u përballur njëkohësisht me jetën pas lindjes së fëmijës së saj më të vogël, kujdesin për fëmijët e tjerë dhe qëndrimet e shpeshta në spital pranë Whimsy-t.
Ajo shtoi se ka pasur ditë më të lehta dhe ditë shumë të vështira, duke theksuar se po përpiqet të japë maksimumin në çdo rol si nënë dhe profesioniste.
Çifti ka katër fëmijë së bashku: Whimsy, Rumble Honey (5 vjeç), Slim Easy (4 vjeç) dhe Fawnie Golden, e lindur në vitin 2025. Lucky Blue Smith ka gjithashtu një vajzë tjetër nga një lidhje e mëparshme.
Nara Smith u shpreh se ndarja e kësaj historie publike ka qenë e vështirë, por shpreson që mund të sjellë mbështetje dhe ndoshta të nxisë edhe të tjerë të kryejnë kontrolle mjekësore në kohë.
