Nuk ka më vend për dyshime: Ben Blushi është zyrtarisht drejtori i ri i Top Channel. Pas asaj që qarkulloi në media, si dhe lajmit të ardhur nga burime të sigurta pranë bordo.al, dita e sotme e ka gjetur Vjollca Hoxhën duke e komunikuar personalisht këtë ndryshim në televizion, me secilin nga departamentet përkatëse në Top Media.
Deklarata e Hoxhës ka qenë kjo:
“Kam kënaqësinë të njoftoj të gjithë shikuesit dhe punonjësit e Top Channel se duke filluar nga sot z. Ben Blushi do të jetë Drejtor i Përgjithshëm i Top Channel. Si një gazetar, shkrimtar dhe politikan që ka vendosur pavarësinë dhe të vërtetën mbi çdo interes, jam e bindur se z.Blushi do të ndihmojë Top Channel për të hapur një cikël të ri komunikimi dhe informimi me të gjithë dashamirësit tanë në krejt hapësirën shqipfolëse.
Dua t’i siguroj të gjithë se Top Channel i mbetet besnik parimeve tona si një media e lirë, e pavarur dhe profesionale, e cila ka qenë, është dhe do të jetë përherë në shërbim të së vërtetës dhe lirisë së informimit.”
Ky nuk është i vetmi ndryshim i ndodhur së fundmi në këtë televizion, e këtu nuk po flasim për largimin e Ballës apo ardhjen e Rakipit. Erion Ylli, zëvendës drejtori i Top Media-s, po përflitet dita-ditës për një largim të mundshëm përdundmitar nga ky post. Tashmë, mbetet për t’u parë nëse Top-i do të sjellë të tjera lëvizje ose jo…



















