‘Love Story’ (Histori Dashurie), kështu do të quhet ‘reality-show’ më i ri që pritet të nisë së shpejti në ekranin e Tv Klan.
Dyshja e njohur e prodhimeve të suksesshme televizive, Vera Grabocka dhe Alketa Vejsiu pritet të sjellin një program, i pari i këtij lloji në Shqipëri, në qendër të të cilit ndodhet ajo për të cilën të gjithë ne çdo ditë qeshim e qajmë, lumturohemi e trishtohemi, nxitojmë e presim, luftojmë e dorëzohemi, kemi logjikuar, ose e kemi humbur arsyen…;dashuria.
Pak minuta më parë nëpërmjet videove në instastory, Alketa ka dhënë disa detaje më shumë, ku duket se në qendër të këtij ‘romani rozë televiziv’ ndodhet një djalë, i cili është në kërkim të dashurisë së jetës së tij.
Pasi ka ftuar djem e vajza të bëhen pjesë e historisë së dashurisë para miliona dëshmitarëve televizivë, Vejsiu nuk ka zbuluar më shumë detaje rreth ‘reality-show-t’ duke na bërë edhe më shumë kuriozë për të ditur se çfarë ka ‘gatuar’ kësaj here skuadra ‘Grabocka-Vejsiu!
Duke shpresuar që gjatë ditëve në vijim të zbulohen të reja të tjera rreth ‘Love Story’, jemi gjithë sy e veshë për të mësuar edhe datën e saktë të nisjes së transmetimit në ekranin e Tv Klan.



















