“Kemi përjetuar një shok të rëndë. Momenti më i vështirë ishte kur fëmija 7 vjeç u gjet në krahët e njeriut të vet që duket sikur e kishte futur për ta mbrojtur. Ne në atë moment patëm një përjetim goxha të thellë“; ky eshte rrëfimi tronditës i zjarrfikësit, Arben Cara, i cili ishte i përfshirë në operacionin e shpëtimit të Klajdi Qatos tek Vila Palma, kur e lajmëruan se duhet të nisej drejt Thumanës. Atje, nën gërmadha ndodheshin të afërm të tij, nga familja Cara.
“Kemi humbur 7 anëtarë të familjes. Ishte dhimbje e madhe. Nuk jam përqendruar vetëm te familja ime, por kam kërkuar me shpirt të gjithë familjarët e tjerë”, tha Arbeni që pavarësisht dramës së tij personale, e theksoi më shumë se një herë për Abc News, se i sheh të gjithë njëlloj, duke ndjerë të njëjtin përkushtim edhe për të tjerët. “Njerëzit prisnin me ankth që ne t’i nxirrnim ata, na shihnin si shpëtimtarë”, është shprehur ai.
